Pas përpjekjeve intensive të mijëra forcave të emergjencave, situata nga zjarret në Shqipëri është stabilizuar, me 57 vatra zjarri të raportuara gjatë 24 orëve të fundit, nga të cilat 29 janë aktive. Forcat zjarrfikëse, bashkiake dhe ushtarake po punojnë intensivisht në disa prej këtyre vatrave.
Në qarkun Vlorë, vatra në Syrin e Kaltër është nën monitorim nga 67 zjarrfikës, 30 forca bashkiake dhe 80 forca të FA. Po ashtu, vazhdojnë operacionet në fshatrat Pecë, Sirikat dhe Kardhikaq. Në Himarë, zjarri në fshatin Kuç është aktiv, ndërsa në fshatin Brataj ka nisur një vatër e re.
Në Dibër, gjatë ditës së sotme forcat zjarrfikëse po përpiqen të mbajnë nën kontroll zjarret në Malin me Gropa dhe në fshatin Tërnovë, ku zjarri ka akoma intensitet të lartë. Por, përveç këtyre, situata nuk paraqet rrezik për banesa.
Qarku Berat është gjithashtu nën presion, me zjarre që kanë rrezikuar sigurinë e banesave në fshatrat Zhapokikë, Plashnik dhe Tërpan. Forcat tokësore po mbështeten nga helikopterë të Emirateve të Bashkuara Arabe dhe të tjerë që operojnë në Gramsh. Situata po monitorohet, dhe ka pasur evakuime për banorët në zona të rrezikuara.
Edhe në Tiranë vijojnë operacionet për shuarjen e zjarreve në fshatin Ibë dhe në zona malore si Damjan-Fortuzaj, ku terreni i vështirë ka ndikuar në veprimet e zjarrfikësve.
Në Gjirokastër, ka zjarre aktive në fshatra si Dhuvjan dhe Hormovë, megjithatë, është arritur të mbahet situata nën kontroll. Po ashtu, në Shkodër dhe Kukës, forcat po vazhdojnë përpjekjet për shuarjen e zjarreve në kushte të vështira.
Në Korçë, zjarri në fshatin Gërmenj po monitorohet nga forcat operative dhe ndihmës, ndërsa raportet tregojnë për shpërthime të municioneve të ndodhura në brendësi të vatrës. Në total, janë angazhuar 1,143 forca operative dhe mbi 65 automjete zjarrfikëse për të luftuar këto situata emergjente.
