Më 31 gusht 1997, bota u trondit nga lajmi për vdekjen e Princeshës Diana, e njohur për humanizmin dhe afërsinë me njerëzit. Ajo humbi jetën në një aksident automobilistik në Paris, ndërsa udhëtonte me partnerin e saj, Dodi Al-Fayed, kur një Mercedes-Benz përfundoi duke u përplasur me një shtyllë. Dodi dhe shoferi Henri Paul humbën jetën në vend, ndërsa Diana vdiq pak më vonë në spital. Njëhtas, truproja e saj, Trevor Rees-Jones, ishte i vetmi që mbijetoi.
Hetimet zyrtare nga autoritetet britanike dhe franceze e konsideruan ngjarjen si një aksident tragjik, duke theksuar gjendjen e dehur të shoferit si shkak kryesor. Megjithatë, shumë njerëz, përfshirë familjen Al-Fayed, besuan se ngjarja ishte një atentat i organizuar. Mohamed Al-Fayed, babai i Dodit, ka akuzuar Shërbimin Britanik të Inteligjencës (MI6) dhe Familjen Mbretërore për përfshirje në këtë ngjarje, duke pretenduar se mbretëria nuk pranonte që Diana, si nënë e trashëgimtarëve të fronit, të martohej me një mysliman.
Një teori tjetër i referohet identitetit të shoferit, Henri Paul. Richard Tomlinson, një ish-anëtar i MI6, sugjeroi se ai kishte lidhje me shërbimet sekrete dhe mund të ishte i infiltruar. Gjetja e një shume të madhe parash nën sediljen e tij pas aksidentit ka ngritur më shumë dyshime për rolin e tij.
Një tjetër pikëpamje e ofruar nga gazetari francez Francis Gillery sugjeron se shënjestra nuk ishte Diana, por Dodi Al-Fayed, i cili ndodhej në Paris për një marrëveshje biznesi. Gillery beson se sulmi kishte si qëllim ndalimin e kësaj marrëveshjeje dhe sulmin mbi familjen Al-Fayed.
Pavarësisht se ka kaluar më shumë se dy dekada nga ajo natë tragjike, teoritë mbi vdekjen e Lady Di vazhdojnë të jetojnë, duke nxitur dyshime dhe debate në opinionin publik. Ajo mbetet një figurë e pazëvendësueshme në historinë moderne, dhe pyetjet mbi ngjarjen vazhdojnë të mbesin pa përgjigje. Ndërsa përvjetori i 28-të i vdekjes së saj po afrohet, reflektimi mbi trashëgiminë dhe rrethana të mundshme të vdekjes së saj vazhdon të jetë në fokus.
