Një burrë amerikan, i cili kaloi gati 28 vjet pas hekurave për një vrasje që ai gjithmonë e ka mohuar ta ketë kryer, ka dalë i pafajshëm në Misuri. BBC shkruan se Lamar Johnson, 50 vjeç, doli nga salla e gjyqit të St Louis i pafajshwm pas një vendimi të gjykatësit David Mason të martën.
Gjykatësi tha se ai veproi pasi dy dëshmitarë kishin ofruar prova të qarta dhe bindëse se Johnson ishte i pafajshëm. Ai ishte dënuar për vrasjen e Marcus Boyd në vitin 1994. Johnson ishte dukshëm i prekur kur u shpall vendimi, ndërsa mbështetësit e tij filluan të brohoritnin dhe duartrokisnin.
“Kjo është dërrmuese,” tha Johnson, pasi doli nga salla e gjyqit.
Vitin e kaluar, avokatja Kim Gardner kishte paraqitur një mocion duke kërkuar lirimin e Johnson pas kryerjes së një hetimi së bashku me organizatën ligjore jofitimprurëse të Projektit Innocence. Pas seancës dëgjimore të së martës, ekipi ligjor i Johnson kritikoi zyrën e prokurorit të përgjithshëm të shtetit, i cili kishte shtyrë ta mbante atë në burg.
Marcus Boyd u qëllua për vdekje nga dy persona të maskuar në verandën e përparme të Johnson në tetor 1994. Johnson ka thënë vazhdimisht se ai nuk ishte në shtëpi kur ndodhi sulmi. Gjykatësi Mason dha vendimin e tij pasi një dëshmitar kishte hequr dorë nga dëshmia e tij dhe një i burgosur kishte rrëfyer se ai qëlloi Boyd me një të dyshuar tjetër, Phil Campbell.
Gjatë gjykimit fillestar, Campbell u deklarua fajtor për një akuzë të reduktuar dhe u dënua me shtatë vjet burg.
