Një aksident i rëndë ka ndodhur në fshatin Dars, ku një automjet tip “Audi” me targa angleze ka dalë nga rruga dhe ka përfunduar në përroin e zonës. Ngjarja u regjistrua rreth orës 01:30, kur shërbimet e Policisë dhe zjarrfikësit u thirrën në vendngjarje.
Shoferi i automjetit, 24-vjeçari A. L., banues në fshatin Fullqet, është identifikuar menjëherë nga Policia. Ai dyshohet se, pas aksidentit, është larguar nga vendi pa njoftuar autoritetet dhe, po ashtu, se nuk i ka ofruar ndihmë pasagjerit të tij, 30-vjeçarit J. K., që dyshohet se është marrë nga rrjedha e përroit.
Pas veprimeve të shpejta, Policia arriti të kapë dhe arrestojë A. L., i cili iu nënshtrua testit të alkoolit, rezultati i të cilit tregoi se ai ishte në gjendje të dehur gjatë drejtimit të mjetit. Kërkimet për gjetjen e pasagjerit J. K. vazhdojnë, me angazhimin e polumbarëve të RENEA-s dhe shërbimeve zjarrfikëse.
Materialet e rastit janë dorëzuar në Prokurori për procedura të mëtejshme. Policia vazhdon hetimet për zbardhjen e plotë të rrethanave të aksidentit dhe veprimet e mundshme ligjore ndaj shoferit.
