Gjergji Nika ka ngritur një denoncim të fortë kundër kryebashkiakes së sapoemëruar të Vlorës, Brunilda Mersini, e cila sipas tij e ka nisur ditën e parë të punës me abuzim të hapur me fondet dhe strukturën e Bashkisë.
Sipas Nikës, Mersini ka kërkuar menjëherë shtimin e 116 punonjësve të rinj, duke e rritur administratën me 8 për qind, jo për t’i shërbyer qytetit, por për të sistemuar njerëzit e partisë dhe për të zgjeruar kontrollin politik mbi institucionin. Në këtë mënyrë, numri total i stafit rritet nga 1480 në 1596 punonjës, duke shtuar barrën financiare mbi buxhetin e bashkisë.
Denoncimi thekson gjithashtu se kryebashkiakja ka shtuar edhe një nënkryetar tjetër, duke sjellë një rritje shtesë prej rreth 40 mijë eurosh vetëm në paga, ndërkohë që institucioni shkon në total në katër nënkryetarë dhe shtatë këshilltarë personalë.
Kjo ndodh në një moment kur qyteti përballet me probleme serioze në pastrim, shërbime dhe infrastrukturë, ndërsa vendimet e para të administratës së re fokusohen në shtim të posteve dhe jo në zgjidhjen e emergjencave të qytetarëve.
Nika rikujton se në nëntor të vitit 2024 ai kishte kundërshtuar ndarjen e ndërmarrjes së pastrimit dhe gjelbërimit, ndërsa në nëntor 2025 kjo administratë i rikthehet së njëjtës strukturë duke e bashkuar sërish.
Për të, ky veprim është dëshmi se Bashkia e Vlorës nuk po drejtohet me vizion, por po mbulon kostot e fushatave dhe premtimeve partiake, të cilat në fund i paguajnë qytetarët.
