Një tjetër tender me vlerë të lartë në Bashkinë Himarë po ngjall dyshime mbi mënyrën se si po menaxhohen fondet publike. Bëhet fjalë për procedurën “Projekte zbatimi, shërbim projektimi”, me fond limit mbi 20.8 milionë lekë pa TVSH, ku në garë morën pjesë vetëm dy operatorë ekonomikë.
Fitues u shpall bashkimi i operatorëve HYDRO-ENG CONSULTING, Engineering Consulting Group dhe SIRE-ALB, me një ofertë prej 19.48 milionë lekësh, shumë pranë fondit limit. Diferenca mes fondit të vënë në dispozicion dhe ofertës fituese është minimale, çka ngre pikëpyetje mbi nivelin real të garës dhe efektivitetin e konkurrencës.
Kur bëhet fjalë për miliona lekë të taksapaguesve, pritet një garë e fortë, me pjesëmarrje të gjerë dhe kursime të ndjeshme për buxhetin publik. Por kur në lojë shfaqen vetëm dy operatorë dhe fondi limit preket pothuajse deri në fund, lind pyetja: a kemi të bëjmë me një proces real konkurrues apo me një garë të paracaktuar ku fituesi dihet që në start?
Bashkia Himarë duhet të japë shpjegime të detajuara mbi kriteret e përzgjedhjes, vlerësimin e ofertave dhe arsyet pse ky tender nuk arriti të tërhiqte më shumë konkurrentë në treg.
Kur miliona lekë publike shpërndahen me diferenca kaq të vogla nga fondi limit, transparenca nuk është luks, por detyrim. Dhe kur dyshimet shtohen, institucionet e kontrollit duhet të verifikojnë nëse çdo procedurë është zhvilluar në përputhje me ligjin dhe interesin publik.
Milionat e qytetarëve nuk mund të trajtohen si pronë private e zyrave të tenderave.
